“МАХН-МҮАН-ын Шударга ёс эвсэл”-ээс УИХ-ын сонгуулийн 26 тойрог, Сонгинохайрханд нэр дэвшигч Дэндэвийн Тэрбишдагва, Жамбалын Хатанбаатар, Гэндэнсүрэнгийн Бямбасүрэн нар өчигдөр Хар хорин захаар зочиллоо.Зах зээр наймаа хийж байгаа хүмүүс тэдэнд жаргал зовлонгоо тоочиж байв. Түрээсийн үнэ нэмэгдсэн, сард 500 төгрөгийн татвар төлдөг байсан бол энэ зургадугаар сарын 1-нээс 2000 төгрөг болж өссөн. Өдөржин халуун наранд шарагдаж суугаад дэндүү бага орлого олдог. Хөхөө өвлийн хүйтэнд гадаа хөлдөж үхэх шахан зогсоод хоолныхоо мөнгийг дөнгөн данган олж байна. Ядаж байхад махны үнэ 9500 төгрөгт хүрч үнэхээр хүнд байна.

Мал аж ахуйн орон атлаа махныхаа үнэд зохицуулалт хийж болдоггүй юм уу энэ төр засаг. Олон сая малтай л гэх юм. Гэтэл махны үнэ тэнгэрт хадаад мань мэтийнх нь олдог хэдэн төгрөг хаанаа ч хүрэхгүй юм даа. Монголчуудын дийлэнхийн амьдрал ийм л байна шүү дээ, энэ улс орон нэг л буруу тийшээ яваад байх юм хэмээцгээж байлаа.Д. Тэрбишдагва, Ж.Хатанбаатар, Г.Бямбасүрэн нарыг зарим иргэд бүчин авч асуулт асууж байлаа. “МАХН-МҮАН-ын Шударга ёс эвсэл” сонгуульд ялалт байгуулбал “Махны үнэд зохицуулалт хийж, тогтвортой барьж чадах уу” хэмээн нэгэн иргэн асуусан юм.

Түүний асуултад УИХ-ын гишүүн, МАХН-ын дэд дарга, нэр дэвшигч Д.Тэрбишдагва намын мөрийн хөтөлбөрт тусгагдсан заалтыг онцолж тайлбарлав.МАХН-МҮАН-ын Шударга ёс эвсэл “Монголоо аврах 5 хувьсгал” хэмээх мөрийн хөтөлбөрийн 2.25 дугаар заалтад “Түлш, шатахуун, цахилгаан, эрчим хүч, мах, сүү, гурил, цагааны будааны үнийг төрөөс зохицуулна” хэмээн тусгаад байгаа. Энэ эвсэлд олон түмэн итгэл хүлээлгэвэл мөрийн хөтөлбөрөө бүрэн хэрэгжүүлэх боломжтой юм. Дэлхийн олон орон хүнсний гол нэрийн бүтээгдэхүүн, шатахуун, цахилгааны үнийг төрийн зохицуулалтайгаар тогтвортой барьдаг туршлага бий.

Өнөөдөр УИХ-ын гишүүн Д.Тэрбишдагва, Ж.Хатанбаатар, Г.Бямбасүрэн нар Сонгинохайрхан дүүргийн 8, 10, 11, 28 дугаар хороодын иргэдтэй уулзалт хийж байна.Энэ үеэр олон иргэн МАХН-д элсч үнэмлэхээ гардан авав. МАНАН-г арилгах улстөрийн эвсэл хэмээн иргэд байр сууриа илэрхийлж байлаа. Д.Тэрбишдагвыг тойрогтоо байнга ирж ажилладаг, бидний элч байх үүргээ сайн биелүүлсэн, эх орон, газар шорооныхоо төлөө үгээ зоригтой хэлдэг, шударга төрийн түшээ хэмээн хүндэлж явдаг гэж иргэд хэлж байв.